ब्रेकिंग

देश

ईडीच्या लाचखोर उपसंचालकाला अटक

Wrutuja pandharpure
31 May 2025

ओडिशात सीबीआयची कारवाई

नवी दिल्ली : ओडिशातील भुुवनेश्वर येथील उद्योगपतीकडून २० लाख रुपयांच्या लाच प्रकरणी ईडीचा उपसंचालक चेतन रघुवंशी याला सीबीआयने अटक केली. उद्योगपती रतिकांत राऊत यांची धेनकनाल येथे दगडखाण आहे. त्यांच्यावर ईडीने कारवाई केली होती. कारवाईतून सुटका व्हावी यासाठी यासाठी रघुवंशी याने राऊत यांच्याकडे पाच कोटी रुपयांची लाच मागितली होती. त्यातील २० लाखांचा पहिला हप्ता घेण्यासाठी रघुवंशी आला होता. तेव्हा सापळा रचून सीबीआयच्या अधिकार्‍यांनी त्याला पकडले. तत्पूर्वी राऊत यांनी रघुवंशी आपल्याकडे प्रकरण दाबण्यासाठी लाच मागत असल्याची तक्रार केली होती. दरम्यान, मार्चमध्ये ईडीने समन्स बजावल्यानंतर राऊत ईडीच्या भुवनेश्वर कार्यालयात गेले होेते.

तेव्हा रघुवंशीने त्यांना आपल्या दालनात बोलावले आणि भगती नामक व्यक्तीला बोलावून प्रकरणातून सुटका करुन घेण्यासाठी पाच कोटी रुपये मागितले होते. नंतर वाटाघाटी होऊन दोन कोटींवर प्रकरण दाबण्याचे ठरले होते. दरम्यान, रघुवंशी हा २०१३ च्या तुकडीचे प्रशासकीय अधिकारी आहे. कस्टम आणि इनडायरेक्ट टॅक्स विभागात तो कार्यरत होता. कारवाईत त्याला सीबीआयने अटक केली असून त्याची चौकशी सुरू केली आहे.